Rammeavtalen for trykkeri utgår
Frå 1. september 2021 opphøyrer rammeavtalen som KHiO har for trykkeritenester. Det betyr at ein ikkje lenger er forplikta til å bruke eitt bestemt trykkeri, men kan velje blant fleire tilbydarar. Dei som etterspør eksterne trykkeoppdrag bør innhente fleire tilbod.
I perioden 2019-21 har KHiO hatt rammeavtale med firmaet Bodoni for trykkeritenester i ein felles avtale med AHO, NMH og NiH. I avtalen låg det moglegheit for forlenging i ytterlegare to eittårsperiodar, noko KHiO no altså har fristilt seg frå. KHiO ligg under terskelverdien på 1,3 millionar kr for innkjøp som utløyser krav om rammeavtale. Eit tilleggsmoment har vore at firmaet, som vann anbodskonkurrasen, har prissett oppdraga til ein langt høgare pris enn det som vart førespegla i anbodskonkurransen.
Skal du trykke noko eksternt?
Det er framleis eit mål at trykkerioppdrag vert gjort til lågast mogleg kostnad. Den som skal tinge trykkeoppdrag bør difor innhente fleire tilbod parallelt og velje det billegaste, dersom leveransen held den kvaliteten som er etterspurt.
Internt kan kommunikasjon hjelpe deg med slike oppdrag, ta kontakt med Even Onsager eller Unn Bjørge.
Kva er ei rammeavtale?
Ei rammeavtale er ei avtale mellom éin eller fleire oppdragsgivarar og éin eller fleire leverandørar som har til formål å fastsette kontraktsvilkåra for dei kontraktane som skal inngåast i løpet av den perioden rammeavtalen varer. Som regel skjer inngåing av rammeavtale etter ein føregåande konkurranse utlyst i Doffin.
Det statlege regelverket for innkjøp pålegg statsinstisjonar å inngå slik avtale når den totale summen overstig eit beløp, ein såkalla terskelverdi.
Rammeavtaler på KHiO
KHiO har per i dag følgjande rammeavtaler:
- Vikartenester: Manpower AS
- Kontorrekvisita: Maske AS
- Cateringtenester: Gastro Catering AS, Elvebredden Catering AS og Rokkekokker
- Reisebyråtenester: Berg-Hansen Reisebureau AS
- Bedriftshelsetenester: Synergi Helse AS Avfallshåndtering/avfallshenting: Stena Recycling AS
Tilsette og studentar er altså pliktige å bruke desse leverandørane for denne typen tenester når det er KHiO som betaler for oppdraget.
I tillegg til desse avtalene finst også nokre andre avtaler, til dømes for telefoni, som det offentlege har inngått for heile UH-sektoren.
På Intranett finn du meir informasjon om innkjøpsregelverket i staten og oversikt over kven i fellesadministrasjonen som kan hjelpe deg om du har spørsmål.