Mari Koppanen - eit designtalent å følge
Ifølge Vogue Scandinavia er Mari Koppanen på toppen av lista over designtalent du bør følge framover. Akkurat no tar ho ein ph.d.-grad på Kunsthøgskolen i Oslo.
– Vogue er eit magasin eg alltid har sett opp til. Derfor var det ei fantastisk overrasking å sjå at dei har vald meg som ei å følge i 2023!, melder ei glad Mari Koppanen.
Vogue Scandinavia: Meet the Scandi interior design stars of tomorrow
I samband med Stockholm’s Furniture Fair har Vogue Scandinavia plukka ut sju talent å følge, og Mari Koppanen med møbelserien FOMES toppar lista.
Frå møbelserien FOMES. Foto: Jere Viinikainen
– I ph.d.-prosjektet mitt forskar eg på material basert på sopp, og då særleg materialet amadou som eg også har brukt i møbelserien FOMES.
I møbelserien som ho laga før ho starta å forske, inngår så langt to sittemøbel. Beina er laga av bjørk og så er dei trekt i det lærliknande materialet amadou laga av handverkarar frå Romania. Setet er trekt med mjuk ull.
– Material laga av sopp vert brukt av fleire innafor designverda no, men etter mi meining så er amadou alle soppmaterial si mor. Det har vore brukt i tusenvis av år i medisinske og spirituelle samanhengar og har ein historisk og kulturell verdi. Til og med Øtzi, den 5000 år gamle mumifiserte mannen funne i ei isbre på den italiensk–austerrikske grensa, hadde amadou med seg. Gjennom å vise potensialet og auke medvettet om materialet, vil eg bidra til å halde denne handverkstradisjonen i live. Møblane vekker interesse og designarrangement som Stockholm’s Furniture Fair er gode forum for å fortelje om materialet, historia og forskinga mi.
I tillegg til å ønske å halde handverkstradisjonen i live er Koppanen også oppteken av at materialet er ei god erstatning for skinn laga av dyr. Ho er sjølv frå ein liten stad i Finland og har alltid vore glad i skogen og den fasinerande hemmelege verda soppane skaper.
– I ph.d.-prosjektet mitt forskar eg på soppen meir som eit kulturelt, pedagogisk og sosialt element. Ein stor del av arbeidet mitt er å samarbeide med den vesle byen der materialet framleis er i bruk til å lage hattar og vesker. Til våren kjem det ein dokumentarfilm som vart filma no i haust og som fortel historia om ein av dei eldste sopphandverkarane i byen.
