Første emeritus ved KHiO

Rektor ved Kunsthøgskolen i Oslo, har vedteke at alderspensjonistar, som ikkje lenger har lønna arbeid ved KHiO, skal få tilbod om forlenga tilknyting, om dei ønsker å framleis gjere ein innsats som er relevant for KHiO. Til grunn for vedtaket framhevar rektor at emeriti representerer ein særskilt ressurs og innehar ein kompetanse som vil vere viktig for KHiO si strategiske måloppnåing.

– Eit slikt tilbod gjer at tilsette kan få ei mykje mjukare landing på arbeidslivet enn tidlegare, som er fint når vanens makt har gjort at skolen er ein stad ein går til. Som emeritus kan eg komme og gå til KHiO som eg vil, og når eg vil, seier Theo Barth.

Barth har gjennom mange år i stillinga som professor i teori og skriving ved avdeling design, arbeidd med noko han har kalla Læringsteateret, saman med masterstudentar. Læringsteateret er basert på interaksjon: materialbaserte øvingar og sosiale høve. Hensikten er å involvere skriving i kunstnarleg praksis, og ei trinnvis integrering av skriving i det same rommet som kunstarbeidet; anten det går føre seg i verkstad/white cube, eller studio/black box.

– Studentane lærer å halde ei loggbok som ei vekedagbok og eit reisefølge gjennom heile studiet. Den er utgangspunkt for visingar og skrivne arbeid. Studentane pliktar å halde ei loggbok, men avgjer sjølv korleis. Målet er å få studentane i førarsetet for eigen masterutdanning, forklarar Barth.

– Theo Barth har vore ein sentral fagperson på KHiO gjennom mange år, seier Lotte Grønneberg, som var vore fungerande dekan ein periode no ved avdeling design. – Arbeidet hans er prega av fagleg nysgjerrigheit, nytenking og eit sterkt engasjement for studentane sine læringsprosessar. Theo har gjennom heile sitt virke vore ein fagperson som sjeldan har nøydd seg med å arbeide innanfor etablerte rammer. Han har heile tida utfordra grenser mellom fagfelt, metodar og praksisar, seier Grønneberg og held fram: – Det er derfor både passande og inspirerande at det er nettopp han som får æra av å vere den første emeritus ved Kunsthøgskolen i Oslo. Dette markerer både tydinga av innsatsen han har lagt ned gjennom sitt virke ved institusjonen, og verdien av at denne kompetansen framleis kan komme KHiO til gode.

– Det som gjer at eg har søkt pensjon tidlegare enn vanleg for mange professorar, kommenterer Barth, er at mi eiga faglege utvikling gjennom forskingsarbeid har teke meg til andre område enn dei eg arbeider med no. Arbeidet med Læringsteateret, som eg har utvikla i samarbeid med supre studentar på masterstudiet i design, er modent til å flytte på seg, først som ein metode til arkiv, feltarbeid og historieforteljing, og for det andre som ein matematisk inngang til visualisering av slutt-tilstandar.

Sluttføringar

Arbeidet med Læringsteateret er etter kvart utvida utanfor KHiO gjennom fleire fagseminar med Nasjonalbiblioteket, og i sommar til Lærdal i Sogn, i samarbeid med gardsbruket Hauge 23.1, som del av samarbeidsprosjektet RE/PAIR. Dette prosjektet fungerer som ein konklusjon på forskingsprosjektet Connecting Wool, der professor Kirsti Bræin, programansvarleg for master i design, har utforska nye bruksområde for ull i samarbeid med studentar, fagfolk og utvalde bedrifter. Deltakarane i Læringsteateret (26.06.26), var sauebønder, kooperativ, kunstnarar, forskarar og lærarar. Theo Barth er godt nøgd med resultatet.

– Spørsmålet vi stilte var: bør sluttføringa av eit prosjekt, her Connecting Wool, bli avslutta med ei plattform for eit nytt mogleg prosjekt? I sum kan vi seie at Læringsteateret utprøver bruken av kunstnarlege metodar til føremål som i utgangspunktet ikkje treng å ha noko med kunst å gjere. Det er nettopp 'sluttføring' som praktisk og teoretisk fokus, eg skal utvikle vidare som emeritus.

Eit arkiv, ein rapport, og ein artikkel vart produsert og alle tre har fått positiv mottaking.

– Emeritusordninga representerer ein viktig måte å ta vare på og vidareføre den erfaringa, kompetansen og kunnskapen som er bygd opp gjennom eit langt fagliv, seier Grønneberg. - Den legg til rette for kunnskapsoverføring satt i system, samtidig som den gjer rom for å fordjupe og vidareutvikle initiativ og faglege spor som allereie er etablert.

Grønneberg er særleg glad for at denne ordninga opnar for fleire perspektiv på kva ein fagleg praksis kan vere.

– Å gå av med pensjon handlar ikkje nødvendigvis om å avslutte et virke, men kan i like stor grad markere starten på ein ny fase. Theo er eit godt eksempel på nett dette, for avdelinga er det verdifullt at vi gjennom emeritusordninga framleis kan ha berøring med Theo sine prosjekt, forsking og praksis, og vi ser fram i mot å følge arbeidet hans vidare, no som emeritus.

Mandag 19. oktober vil professor Bojana Cvejic, frå avdeling dans, samtale med professor emeritus Theo Barth i eit arrangement ope for publikum, sjå meir om arrangementet her Passing it on

I samband med Læringsteateret vil professor emeritus Theo Barth gjerne takke:

Bojana Cvejic (Prof. teori v/dans)
Bjørn Blikstad (PhD, 1. amanuensis, avd. design)
Kirsti Bræin (Prof. i klær, avd. design)
Jan Pettersson (Prof. em. i grafikk, kunst og håndverk)
Janne Camilla Lyster (Prof. i koreografi)
Rolf Gerstlauer (Prof i arkitektur, AHO)
Tore Vagn Lid (Prof. i dramaturgi v/NTNU)
Petrine Vinje (PhD, KHiO)
Lisa Lie (PhD, KHiO)
Brynja Brynjar Bandlien (PhD, KHiO)
Trond Mikkelsen (Seksjonssjef, verksteder og sceneteknikk)
Aase Kvalbein (UH pedagogikk, avd. dans)
Heidi Haraldsen (tidl. prorektor utdanning)
Snelle Hald (dekan avd. dans)
Ida Falck Øien (1. amanuensis klær, avd. design)
Lars Johnsen (forskningsprofessor, DH labben NB)
Marianne Skjulhaug (rekto, KHiOr)
Trond Lossius (tidl. prorektor forskning, KHiO)
Jørn Mortensen (tidl. rektor, KHiO)
Isak Wisløff (stip. KHiO)
Geir Thomas Hylland Eriksen (UiO) (Prof. i sosialantropologi)
Ingjerd Hoëm (UiO) (Prof. i sosialantropologi)
George Marcus (Prof. sosialantropologi, Univ. Irvine)
Dragos Gheorgiu (Prof. i arkeologi, Universitetet i Bucuresti)
Vincent Paladino (lydingeniør og arkeolog, Montclair State University)
Måns Wrange (tidl. rektor, KHiO).
Eirunn Kvalnes (stip. avd. design))
Ane Thon Knutsen PhD, (1. amanuensis, avd. design))
Geir Harald Samuelsen (KMD, Forsker, UiB, KU leder)
Jens Hauge (gårdbruker 23.1)
Bente Øien Hauge (gårdbruker 23.1)
Dag Erik Elgin (tidl. prof. i maleri, KHiO)
Victor Boullet (institute of social hypocricy, Paris).
Ansatte ved design avdelingen v/gjennomganger
Biblioteket på KHiO
Fagseminaret ved Nasjonalbiblioteket
Modellforum & darkness group